"As bágoas correron dos seus ollos e os saloucos
sacudiron o seu corpo. Por vez primeira na illa, abandonouse a eles; eran
espasmos violentos que se apoderaban de todo o seu corpo. A súa voz alzouse
baixo o negro fume, ante as ruínas da illa, e os outros moitos rapaces,
contaxiados polos mesmos sentimentos, comezaron a saloucar tamén. E no medio
deles, co corpo sucio, o pelo enmarañado e o nariz goteando, Ralph chorou pola
perda da inocencia, as tebras do corazón do home e a caída ao baleiro daquel
verdadeiro e sabio amigo."
Ficha técnica
Título: El señor de las moscas
Autora: William Golding
Xénero: Narrativa
Editorial: Alianza editorial
Sinopse
Golding expón a
hipotética situación duns rapaces que tras un accidente aéreo quedan atrapados
nunha illa sen adultos. Unha illa paradisíaca onde os nenos poidan xogar todo o
dia e ser eles mesmos, vivindo aventuras e misterios. Pero por suposto, a
illa é real, e as personaxes (de 5 a 12 anos) evolucionan dunha inicial
inocencia infantil a una total deshumanización a medida que se desenvolve a
difícil convivencia na illa e van xurdindo os conflitos.
Vemos como o que en principio parecía unha
sinxela novela de aventuras, ó estilo de las de Xulio Verne ou do Robinson
Crusoe de Daniel Defoe , convértese, a medida que nos adentramos na trama,
nunha novela de transformación hacia a propia natureza do ser humano e
contemplamos como os cativos van perdendo esa inocencia e os instintos máis
primitivos se impoñen en loitas de poder, que rematan por desencadear a
traxedia final.
Da utopía pasamos á distopía, onde a realidade
é oposta a unha sociedade ideal. Para o autor o home non é bo por natureza e,
polo tanto, calquera estrutura social creada polo ser humano está inevitablemente
corrompida e condenada ao fracaso.
William Golding escritor e poeta inglés, naceu
en Newquay o 19 de setembro de 1911. Está considerado como un dos grandes
autores en lingua inglesa do s.XX.
De familia moi activa social e politicamente, estudou
en Oxford literatura inglesa, publicando o seu primeiro poemario en 1934. Tras
a Segunda Guerra Mundial, na que participou como membro da mariña británica,
logrou publicar en 1954 a súa primeira e máis coñecida novela, titulado O señor
das moscas.
A partir desta obra, Golding pasa a dedicarse á
literatura e a desenvolver varias teorías tanto políticas como sociais e
literarias relacionadas con O señor das moscas. Do resto da súa obra destacan
obras como Martín o náufrago ou a triloxía dos Ritos de Paso.
Entre outros premios e galardóns, Golding logrou
o Premio Nobel de Literatura en 1983 pola súa capacidade para unir tanto a
escura realidade do ser humano cun vibrante espírito de aventuras. Cinco anos
máis tarde foi ordenado Cabaleiro da Orde do Imperio Británico.
William Golding morreu en Perranaworthal o 19
de xuño de 1993, deixando inacabada a súa última novela, A lingua oculta.
O Señor das moscas serviu de inspiración para
toda unha serie de obras de teatro, composicións musicais, series e películas.
A primeira adaptación desta novela ao cine foi nos anos 60 e a última en 1990.
aquí déixovos unha das escenas máis significativas desta versión.
Ningún comentario:
Publicar un comentario